Thursday, 7 October 2010

صورة قديمة

تتصفح الفيس بوك مللاً 
تجد دعوة من اسم أحسته ليس غريباً عليها
أزاحت الأتربة عن الذاكرة المتأكلة
"يااااه ده كان معايا في المدرسة"
ابتسمت حنيناً
أضافته لقائمة الأصدقاء الذين ليسوا أصلاً بأصدقاء
بعد أيام وجدت دعوات أخرى من أسماء أخري ما زالت ترقد في ركن الذاكرة المظلم
أضافتها و على شفتيها ابتسامة من استعاد شيئاً قديماً غالياً
راحت تتصفح أحوالهم و صورهم لترى ماذا فعلت الأيام بهم
أيام؟؟....عشرون عام!
منهم من سافر و منهم من هاجر و منهم من يتنقل بين هنا و هناك..
وجوه ضاحكة و رحلات لأماكن طالما حلمت بزيارتها..وعائلات سعيدة و أطفال مبتسمة و فد أحاطهم الأمان من الجانبين
"اللهم لا حسد"
صورة مدرسية قديمة..تبحث في الوجوه فتجد وجهها هناك
تدقق النظر فيه!!نعم انها هي
تلك الشقاوة التي تقفز من العينين و الابتسامة الماكرة
تبتسم و تشعر بغصة في الحلق
التعليقات تحت الصورة تتوالى
"و الله زمان يا ولاد"
"محدش يعرف محمد عصمت راح فين؟"
"مؤمن و معتز و علي الله يرحمهم"
"ماري اتجوزت و هاجرت"
"مينا فتح شركة عقبالكم"
"فاكرين ميس هالة بتاعت الفرنساوي و مستر بهاء بتاع الانجليزي اللي مكنش بيقول كلمة عربي؟ده خد الدكتوراة من ألمانيا"
تقرأالتعليفات في صمت ..و مازالت عيناها معلقتان على وجة الفتاة الذي يتفجر شقاوة
تعليق موجهه اليها
"انتي لسة بتحبي عبد الحليم حافظ؟ "
"......................"
"انتي لسة شعرك طويل؟"
تنظر في المرآة فلا ترى فتاة الصورة
"......................"
"انتي فين دلوقتي يا بنتي؟دانتي كنتي بتقولي انك حتهدي الدنيا"
ابتسامة ساخرة..ألم تهدها فعلاً فوق رأسها؟
"....................."
"بقيتي مراسلة حرب زي ما كنتي بتقولي,و اتجوزتي واحد غير كل الرجالة؟"
تبتسم في مرارة....آآآآآه
 "......................."
"ييااااه دنتي شكلك اتغير قوي"
"ولادك دول؟ ما شاء الله .. أمال فين صورة باباهم؟"
دمعة مرارة تنحدر
".........................."
"انتي مبترديش ليه؟"
تغلق حسابها على الفيس بوك و تطفئ الحاسوب و الأنوار و تذهب للنوم

أخر الكلام
"الحمد لله الذي لا يحمد على مكروه سواه"

6 comments:

فاتيما said...

هوه الأيام دى
ايام الذكريات الحزينة و لا إيه؟!


تعرفى ؟
انا كمان ببص لصور زمان غالبا بزعل
مش بفرحة .. كما ينبغى
يمكن لأن وقت الحسابات
بطلع خسرانة حاجات غالية
مكنتش اتمنى تضيع
لكن بقول زيك ف النهاية

الحمدلله

الف حمد وشكر
احنا احسن من غيرنا
الف مرة و الحمدلله

حلو البوست يا داليا
و موجع
و رقيق .. زيك

انا كمان
بحبك يا حبيبتى جدا

dahlia.. said...

owأيوة يا فاتيما ألف حمد و شكر..ربنا يخلي ولادنا حتى مش لازم لينا..المهم لنفسهم..احنا خسرنا حاجات كتير اه بس الجزاء عند الكريم اللي مبيروحش عنده حق حد أبداً..ربنا يسعدك يا فاتيما و يفرح قلبك

شيماء جمال(شيمو القمر) said...

السلام عليكم
وحشانى قوى بجد
وكان نفسى اشوفك يوم اللقاء
حقا حقا
الصور القديمة بتفكرنا بأيام عمرنا ما هننساها
وكلامك فكرنى باغنية اجدع صحاب بتاعت سوما
افتكرى الايام الجميلة بجمالها وبذكرياتها وشقاوتها متفكريش فى حاجة تزعلك
ليس كل ما يتمناه المرء مدركه
كل احلامنا اتغيرت كل سن وليه احلامه وآماله
وبعد عشرين سنة كمان امنيكى واحلامك هتكون غير دلوقتى

تحياتى لحروفك
شيمو القمر

dahlia.. said...

حبيبتي ياشيمو بجد وحشاني وحشاني و كان نفسي أ شوفك جدا جدا بس معلش و الله كان غصبعني..الصور القديمة يا شيمو ممكن تكون مصدر سعادة..بس هي الصور الجديدة هي اللي بتخليكي تتحسري على حاجات كتير ضاعت منك بمزاجك و اختيارك..و ترجعي تقولي يا ريتها فضلت زكرى بعيدة جميلة و بس..نورتيني بجد بجد

بت خيخة وأي كلام said...

انا انفجرت من العياط دلوقتى

عارفة لما الواحد يكون على تكة ويجى حد بمنتهى البساطة يقولى ازيك
يقوم هو ينفجر فى العياط

اهو هو ده اللى حصللي دلوقتى لما قريت البوست بتاعك

ومعرفش ليه انا عيطت

dahlia.. said...

نوران..أولاً أنت بجد منورة المدونة..ثانياً كل سنة و انت طيبة..ثالثاً..أنا عارفة كويس قوي احساسك دة لأنه حصلي كتييييير قوييي و أقرب مثل يوم ما قريت بوستك"حريق الذكريات"..ربنا يسعد أيامك و يفرح قلبك يا رب