Wednesday, 24 November 2010

جوا الدايرة



.. مرة زمااان
قلتلي ان الدنيا مسيرها في يوم تجمعنا
مر زمان
و الدنيا خدتنا و ووديتنا
و انت بعدت..أما أنا تهت
جوا الدايرة فضلت ألف لحد ما دخت
و بعد زمان
لما تعبت من الدوران..قمت وقفت
كنت بحاول أرجع تاني
أمشي طبيعي زي زمان... من غير دوران
كنت بحاول أمشي لوحدي من غير حد ورايا-طول الدايرة- يزق
كنت بحاول بس ف وسط الدايرة وقعت
من برة الدايرة لقيت ايد ممدودة و صوت بينادي
و الله زمان..فاكراني؟فاكرة زمان؟
شفتك قدامي..بتقومني من وقعاتي
و بتمسح عن شعري تراب الدنيا و قسوتها
و من عيني دموع فرحة بعيدة كنت نسيتها
بتصحيني..و تفكرني بحلم زمان
فاكرة زمااان؟
لما حلمنا البحر يخدنا لغاية آخره و مايجيبناش؟
لما حلمنا نمد ايدينا لسما بعيدة..ونطول نجمة
نجيبها تنور أيامنا و أحلامنا الجاية
لما حلمنا ببيت بدورين
وبنت و قطة و عصفورتين 
و جنينة ومرجيحة و تلج
ودفاية تقربنا.. تدفينا ف عز البرد

لسة بتحلمي زي زمان؟
أنا دلوقتي جوا الدايرة
بحلم آه..بس الحلم لناس تانيين
طيب و انتي؟..حلمك فين؟
حلمي؟..حلمي حيفضل زي ما كان
أجمل حلم حلمته زمان
..حلمي حيفضل حلم زمان

3 comments:

زكي الأخضر said...

السلام عليكم

نكتب لكم رغبة في أن نعرفكم علينا:

نحن فئة من المسلمين ذات اتجاه وبعد سياسي وعقدي واضح بعيداً عن الغموض، ندعو إلى قراءة الواقع ومعاينة الحقائق بعيداً عن التضليل الإعلامي، ولدينا موقع يهتم بتنمية مهارات فقه الواقع والتحليل السياسي، مجلة العمق:
http://www.al3umq.net/

نعتذر عن كتابة الرسالة في التعليقات لأنه لا يوجد نموذج مراسلة في مدونتكم.


من فضلك أرسل لنا عنوان إيميلك لنرسل لك كل فترة أقوى موضوعاتنا.

مع أطيب التحيات ...

زكي الأخضر

محرر الموقع

أرسل الرسالة لمن تستطيع لتكسب الثواب إن شاء الله.

فاتيما said...

وحشتينى قــــوى
يا داليا

قوى بجد

ازى الولاد وحبيب قلبك ؟
وانتى عاملة ايه؟

احنا هنجيلكم ان شاء الله
ف أول شهر مارس
عشان التبرع بالدم بتاع خيخة
هينعمل عندكم

المرة دى لن اسمح انك تمشى
بسرعة أوتخرجى من حضنى

خلى بالك من نفسك
ونفسى الحزن ياخد هدنة
ويبعد عنك شوية
نفسى بجد

وبحبك بجد
ووحشتينى بجد

dahlia.. said...

فاتيما
و انتي بجد واحشاني قوي قوي وربنا شاهد وعلى طول متابعة كل كلمة بتكتبيها..وأنا نفسي مش عارفة امتى الحزن ده حياخد هدنة ..دلوقتي بقى حزن على حال بلد كل يوم بيعدي عليها أسوأمن اللي قبله..بجد قلبي واجعني قوي قوي على بلدنا و على مستقبل ولادنا فيها..ياااا رب حالها يتعدل قريب لأن دي أخر فرصة!ان شااء الله جاية أول مارس معاكم لو كان ليا عمر و حتبرع ان شاء الله و حاقعد في حضنك اللي وحشني قوييي طول اليوم..بحبك بجد يا أرق صاحبة قابلتها