جوا الدايرة

.. مرة زمااان

قلتلي ان الدنيا مسيرها في يوم تجمعنا

مر زمان
و الدنيا خدتنا و ووديتنا

و انت بعدت..أما أنا تهت

جوا الدايرة فضلت ألف لحد ما دخت

و بعد زمان
لما تعبت من الدوران..قمت وقفت

كنت بحاول أرجع تاني

أمشي طبيعي زي زمان... من غير دوران

كنت بحاول أمشي لوحدي من غير حد ورايا-طول الدايرة- يزق

كنت بحاول بس ف وسط الدايرة وقعت

من برة الدايرة لقيت ايد ممدودة و صوت بينادي

و الله زمان..فاكراني؟فاكرة زمان؟

شفتك قدامي..بتقومني من وقعاتي

و بتمسح عن شعري تراب الدنيا و قسوتها

و من عيني دموع فرحة بعيدة كنت نسيتها

بتصحيني..و تفكرني بحلم زمان

فاكرة زمااان؟

لما حلمنا البحر يخدنا لغاية آخره و مايجيبناش؟

لما حلمنا نمد ايدينا لسما بعيدة..ونطول نجمة

نجيبها تنور أيامنا و أحلامنا الجاية

لما حلمنا ببيت بدورين

وبنت و قطة و عصفورتين 

و جنينة ومرجيحة و تلج

ودفاية تقربنا.. تدفينا ف عز البرد

لسة بتحلمي زي زمان؟

أنا دلوقتي جوا الدايرة

بحلم آه..بس الحلم لناس تانيين

طيب و انتي؟..حلمك فين؟

حلمي؟..حلمي حيفضل زي ما كان

أجمل حلم حلمته زمان
..حلمي حيفضل حلم زمان