دعاء

اللهم إنى اشكو إليك ضعف قوتى و قلة حيلتى و هوانى على الناس
انت رب المستضعفين و انت ربى الى من تكلنى؟
الى بعيد يتجهمنى ؟ ام الى عدو ملكته امرى؟!
ان لم يكن بك على غضب فلا ابالى
اعوذ بنور وجهك الذى اضاءت له الظلمات و صلح عليه امر الدنيا و الاخرة
من ان تنزل بى غضبك او يحل على سخطك
لك العتبى حتى ترضى و لا حول ولا قوة الا بك

اللهم اقذف في قلبي رجاءك و اقطع رجائي عمن سواك
حتى لا أرجو أحداً غيرك

تاج الأحلام

أولاً
رمضان كريم و كل سنة و كلكم طيبين
اللهم بلغنا رمضان و اجعله لنا مغفرة و رحمة و عتق من النار
ثانياً
حبيبتي و روح قلبي شيمو القمر اعترافات قلب أهدتني تاج حلو قوي وده تالت تاج!ودي حاجة عظيمة بصراحة...أنا كان نفسي في تاج بقى عندي تلاتة


بسم الله الرحمن الرحيم
أذكر خمس أحلام على الاقل ..تخص ماضيك وتحلم فيها بتغيير اشياء .. ماذا ستعدل وماذا ستترك؟
كل أحلام زمان لسة زي ما هي أحلام و بس مش حعدل فيها حاجة عشان هي تخص واحدة تانية غيري أنا دلوقتي و أنا تركتها كلها لأن مفيش أي حلم منها اتحقق


1-كان نفسي أبقى صحفية أغير حاجات كتير مش عجباني بقلمي
و بقيت دكتورة أسنان بغير بس في سنان الناس و هما خايفين مني!
2- كان نفسي أسافر و ألف الدنيا كلها
ولحد دلوقتي مش عارفة حتى أروح أعمل عمرة
3-كان نفسي ربنا يرزقني ببنت تبقى صاحبتي و حبيبتي و نحكي لبعض كل حاجة..و دلوقتي أنا عندي ولدين قرود كل لما أسأل أي واحد منهم على أي حاجة يقول لي مش فاكر-بس الحمد لله على نعمته وفضله-غيري مش لاقي خالص
4-كان نفسي مجرحش حد طول ما أنا عايشة بس اكتشفت ان احنا طول ما احنا في الدنيا لازم نجرح و نتجرح
5-كان "نفسي في دنيا يحبها ناسها..و تحب ناسها تشيلها فوق راسها..و الحب ساسها و داب في أنفاسها"! ...مش بقولكم أحلام..أحلام و بس

أذكر خمس أحلام على الأقل ..تخص مستقبلك ؟
1-بحلم اني أدخل الجنة عشان ألاقي فيها اللي ملقتوش في الدنيا
2-بحلم ان ربنا يخليلي جوزي و يخلينا مع بعض على طول من غير ما نظلم حد
3-بحلم ان ربنا يحفظ ولادي و يحميهم و يفضلو يحبوني حتى نص ما أنا بحبهم و يكبرو و يشرفو بلادهم و دينهم و يعيشوا في بلد بتاعتهم مش بتاعت ناس غيرهم
4-بحلم أزور بيت ربنا و لو مرة واحدة في حياتي
5- بحلم ابقى كاتبة مش مشهورة قوي يعني ..ويتنشرلي روايات و قصص قصيرة

برضه كلها أحلام..أحلام و بس!

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ....
هو شخص واحد بس..جوزي
لو كان موجود من زمان كانت حاجات كتيييييير قوي اتغيرت في حياتي

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا .. ؟
الرسول عليه الصلاة و السلام عشان ولادي يتعلمو يحبوا دينهم صح
عبد الناصر عشان يتعلموا يحبوا بلدهم صح

تحدث عن ستة أسرار قد لا يكتشفها من يقابلك للمرة الأولى ؟
ا- كمية المشاكل اللي في حياتي
2- اني أم لولدين أكبرهم عنده 6 سنين(أصل شكلي ميديش خاااااالص) ز
3-اني بخاف من بكرة قوي
4-ان الجنون والجرأة الزائدة أحيانا وراهم سنين كبت طويييييلة
5-ان الهزار الكتيرو الضحك وراهم قلب موجوع و سخرية مريرة من الواقع

تهدي التاج دا لمييييييييين؟

لفاتيما

ولكل اللي عايزه


خلاص كدة

كل سنة و انتم طيبين

لم تعد هناك

هناك..في الركن المنزوي البعيد..فوق الطاولة الخشبية المنسية..تجلس ساكنة ..تمد يداً متكسرة الأصابع للهواء الخالي من الرفقة و الونس..
صمتها -المفروض عليها- هو بعض من صمت أكبر يحيط بها..أدارت ظهرها لكل شيء و سقطت طواعية في ذكرياتها التي لا تخص سواها..

دفء المخمل الأزرق و أمان الصندوق الذهبي ذو الفراشات الملونة ونعومة أوراق الورد المجفف المنثورة حولها..
ثم يد ناعمة تخرجها ببطءمن عالمها الآمن..تتحسس بشرتها العاجية البيضاء..وجهها المنحوت بدقة و ابتسامتها الواعدة..يدها ذي الأصابع الرقيقة الممدودة في أمل و فستانها الأبيض ذو الثنيات الأنثوية الدقيقة..
تضمها اليدالناعمة برفق لحضن تفوح منه رائحة الأوركيد الممزوجة بالفانيليا الطازجة..لتتغير بعد ذلك الأماكن وتبقى تلك الرائحة دليلها و أمانها..
تجلس حيناً على الطاولة المجاورة لفراش صاحبتها و حيناً فوق المكتب الصغير..فهي أول هداياه اليها و أعزها لديها.. لذلك تبقيها بجوارها أينما كانت..
تنتقل بعد ذلك لمنزل أكثر حميمية تفوح منه -بجوار رائحة الأوركيد و الفانيليا الطازجة- رائحة القرفة حيناً و البرتقال حيناً و الدفء دائماً..
تجلس في فخر على الطاولة الرخامية العالية في مقدمة المنزل تستقبل القادمين بيدهاً الممدودة ترحاباً!

بات مكانها دولاب التحف المغلق الذي لا تفوح منه سوى رائحة الهواء الذي لا يتجدد..
تفتحه صاحبتها كل فترة لتزيح عنها الأتربة وتتحسسها في خلسة من طفلها الذي تستطيع يده أن تطول كل ما هو ثمين!

أخيراً تحررت من حبسها الذي دام أعواماً طويلة..لم تعد للطاولة الرخامية الخضراء, لأنها لم تعد هناك..
تقبلت مكانها الجديد فوق طاولة خشبية منخفضة في ركن هادئ بعيد..و لكن أشياء كثيرة لم تعد هناك..
رائحة الأوركيد و الفانيليا الطازجة..لمسة اليد الناعمة..رائحة القرفة و البرتقال الآتية من المطبخ..صوت الضحكات و الهمس القادم من الحجرة البعيدة..الدفء المحيط بكل شيء..
الصمت هو كل ما كان هناك..الصمت و رائحة الأتربة التي راحت تتراكم فوق بياضها العاجي!

ذات يوم..كسر الصمت أصوات عالية متداخلة..وامتلأ الهواء برائحة الغضب..
أصوات ارتطام و أشياء تتكسر..كلمات قاسية و ردود جارحة..الأصوات تقترب..
تشعر أخيراً باليد الناعمة تحملها من مكانها..
ثم تشعر باندفاع الهواء أو اندفاعها هي في الهواء..
ثم ترتطم بشيء صلب بارد..ثم..الصمت مرة أخرى..
ثم لا شيء..
لأنها هي أيضاً لم تعد هناك