Monday 4 May 2009

التاج التاني


شكلها كدة حتلعب معاك يا حمااااادة!!تاني تاج أهه.. و من مين؟؟ من شيمو القمر اعترافات قلب .. اللي بجد أحلى من القمر بصراحة التاج صعب قوي..بس ربنا يسهل ..يالا؟
من أنت و ما الذي تفعله هنا؟
واحد من الناس..زي كل الناس..ناس عايشة بتجري و شقيانة و أهي عايشة و خلاص
و الشقي مش لازم يكون على لقمة العيش بس..ممكن يبقى شقى و انت بتحاول تدور على السعادة و تلاقي سكتها صعبة قوي..أو و أنت بتربي و لادك عشان يبقوا أحسن منك في زمن أوحش بكتييير من زمنك.. أو و أنت بتحاول تسعد اللي حواليك و متعرفش..أو و أنت بتحاول تتدور على حلمك و في وسط السكة تلاقي نفسك نسيت هو كان ايه!!و ماذا أفعل هنا؟ بحاول أحكي عن الحاجات دي كلها يا امة عشان النصيحة..أو العبرة أو الفضفضة أو كل دول مع بعض...عشان الدنيا من غير ناس ما تنداس

اسرائيل تقصف كل جنوب بحثاً عنك..أي شمال ستقصد؟
سأقصد أقصى أول جنوب تقصفه!! أولاً..عشان أسئلهم سؤال مهم جداَ على ايه يا حسرة؟؟؟ ثانياً..عشان أعلم ولادي إن لما حد يبقى بيجري وراك عشان يضربك..أوعى تجري قدامه ..لف و اجري انت وراه ثالثاً..عشان بجد بجد أنا نفسي أموت شهيدة..على الأقل أضمن ان أخرتي تبقي أحسن من دنيتي

انت مكلف بحذف حرف من حروف اللغة العربية..أيها ستختار و لماذ؟
و الحروف ذنبها ايه يا حرام نحرمها من أخواتها و عيليتها؟..بس لو بإيدي..أنا أحذف حرف واحد من أي كلمة بتجرح عشان ما تجرحش..و أي كلمة بتوجع عشان ما توجعش..و أي كلمة بتأذي عشان ما تأذيش

لو قدر لك أن تدخل السجن فما هي القضية التي تتمنى أن تدخل بها اليه؟
قلب نظام الحكم..بس أمانة عليكم بعد ما يكون اتقلب عشان ألحق أشوف ولاد ولاد ولادي
!

بالمناسبة..متى اكتشفت نفسك؟
بالمناسبة..مين قال إني اكتشفتها؟؟مكنش دة بقى حالي..أنا لسة كل يوم بكتشف حاجة جديدة.....يا مسهللل

على مفترق طريق لافتتان ، اليمنى تقول ( إلى حلمك ) واليسرى تقول(إلى ما لم يحلم به بشر),أي الطرق ستسلك؟
سأسلك طريق (إلى حلمك) ليه؟
أولاً .. عشان هو في اليمين و نفسي أكون من أهل اليمين
ثانياً..عشان ده حلمي..حلمي يا نااااس وبيفطة كمان؟حد طايل؟؟
ثالثاً..اليافطة التانية بتقول (ما لم يحلم به بشر) ايش ضمني أنا يطلع ايه ده؟؟؟؟؟

نحن لا نعيش حياتنا..بل نتعلم فيها كيف نعيش..ما تعليقك؟
أحب أضيف انها كانت رقاصة.. و بترقص:)!!!
بجد بقى..صح طبعاً..بس أحب أضيف اننا نتعلم فيها كيف نعيش بعد أن نكون قد عشنا خلاص

بجملة واحدة فقط لكل كلمة من الكلمات التالية
الوطن
مصر..بكل حنانها و أمانها و جنانها(مش جمع جنة)!
الأم
الحضن الدافي
الليل
قمر و نجوم و نسمة هوا و حضن للسهران..
الحب
يعطي للأشياء معنى و للحياة طعم و لون
أمريكا
أكتر بلد اتدعى عليها بعد اسرائيل
المرأة
سر الأسرار
الصمت
الحل الأمثل في اللحظات الحرجة
الانترنت
دنيا زي بتاعتنا دي..بس مواصلاتها أسهل كتيييير

اختر منصباً و اتخذ قراراً
رئيسة الجمهورية
مصادرة أموال الأسرة المالكة و الأسر المحيطة و توزيعها على الشعب عشان يعيش مستريح ال100 سنة الجاية

قيس و عنترة وجميل يقولون شعراً.. و ليلى و عبلة و عزة صموت..لماذا هذا التغيب للمرأة؟
مين قالك؟يمكن كانو بيكتبو برضه..بس مكنش فيه أيامهم ماما سوزان
:)!!!!!!!!!!!!!!!!!!!!!!!!!!

أن تكون مطلوباً لإرتكابك جريمة..خير لك من أن لا تكون مطلوب مطلقاً..هل تتفق مع هذة العبارة؟علل
لو جريمة من اللي بيحاسبوا عليها في الزمن ده,أو لو معنى أن لا أكون مطلوبة هو أن لا يشعر بي أحد أو لا يكون لي تأثير على أحد يبقى أهلاً بسجن أبو زعبل كله..

إلى أين تمضي كلمات الحب بعد أن نقولها؟
تمضي الى القلب لتسكنه و تنيره و تدفئه..فتغير حياتك كلها

هل تجد علاقة بشكل أو بآخر بين المرأة و قطاع الطرق؟
على فكرة أنا مرأة ..و مش منطقي أبدااااااً اني أقولك آه
:))

هذا فراق بيني و بينك..لمن و متى تقولها؟
أنا قلتها خلاص..لزوجي السابق ومش ندمانة عليها

كيف هو غداً؟
غامض و في علم الله..و أتمنى من الله أن يكون أفضل من الأمس

أمرر التاج الى
لأي حد يقرا البوست ده و يعلق عليه
و ل
فاتيما روح قلب ماما
خلاص كدة



5 comments:

عاشقه الرومانسيه said...

انا هاعلق واروح اقرا
حجززززززززز

عاشقه الرومانسيه said...

باااااااااك
ايه ده هو مفيش حد جه غيرى ولا ايه؟
عموما الاجابات جمييييييييله
تسلم ايدك ياقمر

dahlia.. said...

عاشقة الرومانسية
نورتيني ..و على فكرة أنا شفتك يوم اللقاء التدويني في نادي الأطباء بس أنا كنت ماشية بس شكلك عسولة قوووووي شكرا لتعليقك و في انتظار اجاباتك على التاج

شيماء جمال(شيمو القمر) said...

وااااااااااااااااااااو
ايه الاجابات الجميلة ده
بجد جاوبتى عليه بطريقة حلوة قوى
وربنا يحققلك كل اللى بتتمنيه
ويخليلك ولادك ويكونوا حاجة كبيرة قوى
ربنا يخليك على كلامك الحلو اللى قلتيه علـىّ
أنت اللى قمر
تحياتى
شيمو القمر

dahlia.. said...

شيمو القمر
شكراً على التاج و شكراً على كلماتك الحلوة و شكراً على تواجدك الدائم
دمتي كما انت