Thursday, 2 April 2009

أغلى تاج


أول تاج يتبعتلي.. و بجد أنا متأكدة أنه حيكون أعز و أغلى تاج(و يمكن الوحيد مين عارف)..لأنه أولاً من فاتيما مامت يوسف روح قلبي و روح قلب كل المدونين تقريباً و اللي حاسة انها همزة الوصل بينهم..و ثانياً لأنه زي ما قلت أول تاج و أول مرة في كل حاجة بتبقى ليها غلاوة و حلاوة متتنسيش..ثالثاً لأني حاسة اني كدة دخلت عالم الخيال المثالي رسمي و خدت الختم كمان


دلوقتي وقت الإجابات


أن أن أن أأأأأأأأأأأأأأأأأأأأأن

إسمك
داليا مختار
الأسم المشهورة بيه وسط صحابك
دودة مش دووده
ها؟ dodah

سنك
أغسطس الجاي حتّم 30 إن شاء الله
(مش كبيرة أوي يعني)

مجال دراستك
بكالريوس طب أسنان بتقدير عام جيد جداً
:)(مش نخع و الله)

اسم مدونتك
ركني البعيد الهاديء My corner
بس بفكر جدياً أغيره..أي حد ربنا يكرمه بإسم حلو يا ريت يسيبهولي في التعليقات و يبقى كتر ألف خيره و له الأجر و الثواب عند الله

صورك الرمزية في المدونة بتعبر عن ايه
فراااااشة
أصل فيه حد غاااااالي عندي قوييي قالي قبل كدة انه كل ميشوف فراشة يفتكرني
(تفتكرو أنا وشي تكني كولورز كدة؟و لا يمكن عايزة أتضرب بمضرب الفراش؟):)
فأنا ايه بقى صدقت و لقيت نفسي أنا كمان بحب الفراشات قوي

هل فكرت في إغلاق مدونتك؟السبب
لأ لسة محصليش الشرف..ليه؟ لأني صلاً لسة فاتحة و بقول يا فتاح يا عليم يا رزاق يا كريم
بس مين عارف

ايه رد فعلك لو حد قل أدبه عليك في المدونة؟
ممممم حتصدم..لأن المدونة أصلاً كلها رومانسية و كآبة و شموع وكدة فليه قلة الأدب بقى..بس لو حد اتخنق مني و من كآبتي مثلاً طبعاً حعزره..أنا نفسي بتخنق مني ساعات.. أما لو قل أدبه في حتة رومانسية كدة حيبقى يومه فلة..حيكتشف مواهبي في طولة اللسان اللي مجربهاش حد للأسف لسة:)

أسوأمدونة دخلتها
كل إنسان من حقه يعبر عن رأيه ومحدش يقدر يحكم عليه انه وحش..بس بجد فيه مدونة لما دخلتها جسمي كله قشعر ووجعني قوي و صعب عل صاحبها قوي..عيب أحط لينك ليها؟أنا أسفة لصاحبها بس ححطه و أوعوا حد يتأثر بالكلما دة و اللعياذو بالله..ربنا يهدينا جميعا

حيحصل ايه للإيميلات بعد ما تموتي
ولا أي حاجة حتفضل زي ما هي لحد ما هوتميل و جيميل و ياهووو يزهقوا ويقفلوها

إديت الباسوورد لحد قبل كدة
آآه لاتنين بس و باسم الله ما شاء الله الاتنين عندهم زهايمر..يعني كأني مدتهووش لحد

السفر بالنسبة لك
طووول عمره حلم حياتي كان نفسي ألف الدنيا كلها و أعيش في حتة فيها جليد و خضرة و بحيرة و حركات كدة معرفش ازاي الحاجات دي تركب علىبعض..بس لما كبرت شوية و جبت فارس و يحيي ولادي حسيت إن البلد دي محتاجالهم قوي وإن مينفعش أزرع فيهم حبها و أنا عايزة أسيبها..فدلوقتي نفسي أسافر حبة صغننة كدة و أرجع تاني للهم اللي هنا

الموود بتاعك ايه
غالباً متشآمة و خايفة من بكرة و دة مش عشان انا كئيبة لا قدر الله( ده أنا دمي زي السكر) بس عشان أنا شفت حاجات وحشة كتير

بتعمل ايه في أوقات فراغك
بقراااا (الفعل مش الأنيمل يا ولاد) بجد القراية حاجة مهمة قوي قوي في حياتي و مبزهقش منها أبدا

الأكلة المفضلة
زمااااااان لما كان عندي بطن..كنت بموت في الملوخية و القلقاس و الفراخ و أم علي
دلوقتي كل ما تبقى من ذكرى الطعام العزيز عليا هو
الشيكولاتة البيضا
الأيس كريم
الأيس كريم الأيس كريم.....الخ

الصفات اللي خدتها من والدك
حبه لعبد الحليم حافظ

الصفات اللي خدتها من والدتك
ولااااا أييييي حاااااججججة
(الظاهركل صفاتي أخداها من البواب..على أساس اني كنت بسلم عليه كتير و أن نازلة و أنا طالعة)

أكتر 6 حاجات بتكرههم
الظلم..الظلم ..الظلم
الاستهبال(سواء رجالة أو ستات)ماشيي
الكدب
حشرية البشر في حياة البشر
الجواااااااازززززز في سن صغييييير(بجد أوعوااااا يا جماعة) أنا عملت اللي عليا
فارس لما يتنطط قدامي و يهبد على الأرض و يعيط زي البنات

أكتر 6 حاجات بتحبهم
ولادي
الإنسان اللي غير حياتي كلها
البحر
المشي تحت المطر
صحابيي
العدل
الشيكولاتة البيضا و الأيس كريم فوق البيعة

شخصيتك نوعها ايه
مجنونة بس غلبانة و أصعب عليكم
مجنونة عشان بعمل حاجات مع بعض مش لايقة على بعض
و أصعب عليكم عشان الحاجات اللي عكس بعض اللي جوايا بجد تتعب

لماذا دخلت التدوين في الأساس
حسيت اني لو مطلعتش اللي جوايا في المرحلة دي حنفجر و كمان عشان كتير بكتب حاجات و أجي أدور عليها ملقيهاش فالمدونة هي المكان اللي الحاجة فيه عمرها ما تضيع

أجمل كلمة اتقالت في وصف مدونتك

بجد أي كلمة بتتقال من أي حد بيجي مدونتي و بيهتم يعلق هي أجمل كلمة

أهمية التعليقات بالنسبة ليك
في البداية أنا كنت بكتب لنفسي و مكنتش بستنى ان حد يعلق..لكن بعد دخلت أكتر في عالم التدوين و بعد المقابلة اللي حصلت هنا في اسكندرية حسيت اني فعلا عايزة الناس دي تشاركني في كل حاجة و أعرف رأيهم لأني بعتز بيه

أجمل بست كتبته مع لينك ليه و السبب
أنا لسة معنديش بوستات كتير بس أكتر واحد بحب أقراه وأنا متضايقة هو معك فقط
و السبب أني كتبته و أنا فرحانة قوي و كنت مقضية يوم فعلاً من أجمل أيام عمري و كنت حاسة ان الكلام طالع لوحده

أفضل مدونة قريتها
كل المدونات اللي عندي على الريدر..بحس ان كل واحدة ليها طعم مختلف ..واحدة بتضحكني قوي وواحدة بتضحكني و تبكيني في نفس الوقت وواحدة بتقطع قلبي وواحدة بتخليني طايرة..كدة

أفضل بوست قريته
هما كتيير بصراحة
بس أكتر واحد قصر فيا كان بوست من اليوسفيات لفاتيما كان أول مرة أقرالها و كنت لواحدي وولادي مكنوش معايا..بجد حسيت ان كلي بيترج من كترالعياط


الشغل بالنسبة ليك
مهم جداً و خصوصاً في زمننا دة..و يبقى أحلى لو بتعمل حاجة بتحبها و أحلى و أحلى لو مع ناس بتحبهم


الانترنت بالنسبة ليك
من كام سنة كان كل حياتي بمعنى الكلمة..و دة مكنش حاجة حلوة..حسيت اني عايشة جوة وهم كبير..أما دلوقتي هو وسيلة عشان أعبر عن نفسي و عشان أشوف ناس بحبهم و بحترمهم قوي..طبعاً أنتم:)

تمرر التاج لمين

لكل واحد موجود في الريدر عندي و لحنين القلب لحد ما أحطها على الريدر و أسير الجراح كمان


خلاص كدة

أتمنى مكنش طولت عليكم و زهقتكم











6 comments:

اعترافات قلب said...

ده ايه الاجابات الجامدة ده
التاج ده لف على كل اللى نعرفهم واحد واحد
اجاباتك كلها تنم عن شخصية تُقدر
تحياتى
شيمو القمر

فاتيما said...

أولاً
أزيك يا جميلة القلب و الروح
ثانيا فطستينى من الضحك فى كام إجابة خصوصا بتاعة البواب دى ...
و الحاجات اللى بتكرهيها و اللى كمان بتحبيها ...
البوست بتاعك رومانسى عاتشيفى و أنا عارفة اللى فيها فبلاش أسيح ...
بس يا بخته
يا بخته
يا بخته
ثالثاً الفراشة أليق صورة ليكى ... لأنك زيها
خفيفة الروح و عاملة زى الحلم اللى يتشاف و يتحس بجماله لكن ميتلمسشى ...
يطير بعيد متلحقشى تقربله قوى
زعلت لما بوست عندى نكد عليكى و عيطك
يا عيال و الله ما بقصد
أنتوا قلبكو خفيف كدا ليه ؟؟
احسن حاجة عملتيها إنك دخلتى التدوين
و إن شاء الله دايما وسطينا و منورنا
و عاوزة تاخدى رأينا
بلا نيلة يا بنتى هنوكسك و نجيبك ورا
بهز بهزر
دحنا كلنا غلابة
و صدقينى بحس إننا بنتسند على بعض
أنا ساعات أقول إن الصديق دا عامل زى الدكتور النفسانى
بس ببلاش
التدوين عامل زى جلسات العلاج الجماعى اللى بنشوفها فى الأفلام الاجنبى
مجموعة من الناس بتتخفف من همومها و تشارك الآخرين تجاربها
و الكل بيستفيد
ربنا يصلح احوالك كلها
و يسعدك يا رب
و يخلى يحيى و فارس و تجوزى عيالهم
و بحبك يا فراشة يا شقية يا عاية فى احلى بلد فى الدنيا
بوسة و حضونة كبيييييييييرة قوى

dahlia.. said...

شيمو القمر
فعلا أنا لقيت التاج دة في مدونات كتير بزورها و اجاباته اللي قريتها بتدل على ان الناس دي ناس حلوة قوي قوي بجد
تحياتي و أشواقي

dahlia.. said...

فاتيما مامت يوسف حبيبة قلبى

لو أنا فراشة أمال انت تبقي ابه..بجد و أنا قاعدة معاكي و كنت حاسة انك بتنشري البهجة حواليكي زي الفراشة بالظبط.. أما بالنسبة للبوست بتاعك فعلى قد ما عيطني على قد ما حسسني اني بجد مش لوحدي في الدنيا و ان في ناس حلوة قوي و طيبة قوي قوي بيجرالهاأكتر من اللي جرالي و لسة عندهم أمل في بكرة..بجد بجد يا فاتيما التدوين و معرفتي بيكي و بكل المدونين الحلوين أجمل حاجة حصلتلي من زمااان قوي
ربنا يريح قلبك , يسعدك..حضن إإآآآآآد الدنيا و بوسة كبييييييييييرة قوي

يـــا ســـر said...

مرحباً

انا ياسر, مدون مصري ملحد.. اعتقد انك على علم بذلك مسبقاً

من خلال استطلاعي لإحصائيات مدونتي, وجدت اني قد تلقيت زواراً من موقع غريب لا يبدوا ان له علاقة بالأديان, فأثار ذلك فضولي وقررت ان استطلع الأمر

بعد قرائتي لبعض مقالاتك أدركت انك انسانة مثقفة وتمتلكين اسلوب كتابي مميز, فأحببت ان اترك تعليق بسيط للإشادة بذلك على الرغم من انك قد اوضحتي موقفك تجاه كتاباتي مسبقاً..

أعلم ان كلمة ملحد تدب الرعب وتثير المخاوف في قلوب الناس, وأعلم ان صورتي مشوهة وانك كمسلمة او مسيحية او يهودية من الطبيعي ان تكرهيني لمجرد كوني ملحداً, ولذلك لا انتظر احتراماً او تقديراً من اي أحد.. لكن على الأقل يجب ان تعلمي اننا بشر ولدينا افكارنا التي ندعوا اليها بالحسنى, ولم نسمع يوماً ما عن ملحد رفع سيفه لينشر فكره

الإختلاف في الرأي لا يفسد للود قضية, وكما تؤمنين انك على صواب.. نحن أيضاً نؤمن بأننا على صواب

تحياتي

ياسر

dahlia.. said...

ياسر
أهلا بيك في مدونتي و أحب أقولك انني لم أهاجمك بأي طريقة و أني قلت ان من حق كل واحد يقول رأيه و مش من حق حد يحكم عليه..و أنا مش أخدة منك أي موقف لأن الدين أو عدمه دي حاجة تخص الأنسان لوحده و بينه و بين ربه..أنا بس لما دخلت مدونتك حسيت بأن كلي وجعني من كلامك مش عشان بتهاجم دين معين بس عشان لو فعلا ربنا مش موجود يبقي فيه ناس كتير و أنا منهم حيجو الدنيا و يمشو منهم و هما بيتعذبو من غير حتى أمل في حياه أفضل و عدل في مكان أفضل
تحياتي و أسفة لازعاجك