خليني أقولك

خليني أقولك ع اللي فيا..من غير ما قلبك يوجعك..
من غير ما أحزاني تخضّك .. و لا كلامي يجرحك

كان نفسي ألاقي جوة حضنك كل حلم ف عمري كان

كان نفسي ألاقي فرحة البنت اللي تاهت من ايديا من زمان
كان نفسي أدفيها بحبك..

كان نفسي أدوقها معاك طعم الأمان
كان نفسي تكبر بين ايديك..

و تشوف حلاوة الدنيا لما تشوفها معكوسة ف عينيك
كان نفسي تنسى أي حزن عليها مر..
كان نفسي طعم شفايافك الحلوة يشيل من فوق شفايفها ملوحة دمع مّر!
كان نفسي يديها الزمن فرصة عشان تديك من الفرحة اللي كانت شيلهالك
كان عندها من كل حاجة ألف حاجة تدهيالك ..
كان عندها مليون حكاية لسة عايزة تحكيهالك
لكن زمنكم كان غلط..مدت ايديها عشان تطولك

..مسكت في كمك..شّدته..لكن فلّت!
كانت ايديك بالحب ليها ممدودين..

لكنهم بحاجات كتيرة وهم عُمر و حتّة منك ملينيين
و فضلت أنت و هي و الحب اللي بينكم

و الحاجات الحلوة اللي مستنية لسة تبقى بينكم في الطريق مستنين
وسؤال بيجيي ألف مرة ف كل يوم من عمركم.

.ازاي حنرجع بالزمن تاني لورا

علشان نرجع فرحنا و لعمرنا أجمل سنين