خلاص كدة

علم اللوع اضخم كتـــــــــاب في الأرض

بس اللي يغلط فيه يجيـــــــــبــه الأرض

أما الصراحة فأمرها ســـــــــــــــــاهل

لكن لا تجلب مال و لا تصون عرض

عجبي اعتراف واجب أعتقد الأن ان اللي كانو بيقولو اللي قامو بالثورة دول أقلية و لو هما 8 مليون احنا 80 مليون كان عندهم حق...اللي عملوا الثورة دي أقلية..حقكوا علينا آخر 4 كلمات يا عيني عليكي يا مصر

من الآخر كدة

أنا بجد مرعوبة 

مرعووبة أكتر 1000 مرة من يوم 28 لما العربية الدبلوماسية البيضا عدت جنبي في القصر العيني

مرعوبة أكتر 1000 مرة من رعبي و أنا شايفة الجثث و الدم في كل حتة

يومها كنت عارفة و الناس كلها عارفة ان الشر بيحارب الخير

كلنا كنا عارفين يومها مين الظالم و مين المظلوم..مين الصح و مين الغلط

و دلوقتي؟؟؟؟

محدش عارف أي حاجة..الثوار بقوا عملا و النشطاء بقوا بلطجية

و عمرو موسى بقى الرئيس المنتظر

و الجيش بقى بطل الأبطال و هو بيصعق الناس و يعذبهم عشان مسمعوش الكلام!!!

و تسمع ناس كتييييير بتقول"أحسن في 60 داهية خللي البلد تنضف!" و ناس تانية تتحايل عالجيش و تقوله و النبي و النبي عايزيين أحكام عرفية!"

بجد احنا عايشين في مؤامرة كبيييييرة و كل واحد بقى جواها و بيساعد فيها..بكلامه أو أفعاله أو حتى سكوته

و الوقت بيمر و الناس بتزهق..والتعديلات الخايبة جاية..و الناس عايزة تخلص

و الجيش عايز يخلص الليلة..بس المهم يخلصها صح

و سلملي عالثورة

أنا معنديش نصايح و لا حلول سحرية و لا زفت

كل اللي أقدر عليه و اللي أعتقد ان كل واحد فاهم و بيفكر يقدر عليه هو انه يفكر في موضوع التعديلات الدستورية دي 

عايزة أسأل كام سؤال

ليه التصويت على التعديلات كلها مش مادة مادة..هي دي الديموقراطية اللي مات الناس عشانها و اتصابنا من تحت راسها؟

ليه التعديلات دي مفيهاش أي تقليص لصلاحيات الزفت الرئيس؟

ليه مفيش أوبشن تالت مع نعم و لا و يكون دستور جديد؟

يا نااااااااس أنا مصدومة من ناس من قلب الثورة بتقول حاقول أه عشان الجيش خلاص اتخنق مننا

طب ما مبارك كان مخنوق مننا..مسكتنلوش ليه؟

الجيش اتخنق من الاعتصامات؟يطلع أم المعتقلين و يعمل دستور جديد أو لو ملوش مزاج  يضيف كام تعديل على التعديلات دي و أهمها صلاحيات الزفت و يخليه دستور مؤقت و يقبض على الكلاب صفوت و سرور و زكريا اللي طالع يتفشخر بعد أمن الدولة مفرملوا ورقه و بيقول انه شغاااال مع الجيشو طظ فيكم

اعقلوهااااا يا ناس

ولو رجعتم تخافوا تاني و مش عايزيين ثورة و لا زفت أقل حاجة أقل حاجة أقل حاجة تعملوها انكم تقولوا لا لا لا للتعديلات الدستورية

عشان جيشنا بتاع الأغلبية و المليون اللي بيصدقهم يعرف ان الأغلبية اهي رافضة اللي بيعملوا

فيعملهم اللي هم عايزينه

و يا ريت لو جيشنا بجد اتخنق و زهق من المدنيين و مش عايز مظاهرات و عايز يرجع مكانه يعمل استفتاء على المجلس الرئاسي ده
عشان مش كل حاجة عايزنها ننزله الشارع و يبهدل فينا

أنا مش بكره الجيش و لا ضده..بس أنا واثقة ان قياداته من النظام القديم اللي احنا كنا بنادي زماااان و نقوله " الشعب يريد اسقاط النظام"

الله يرحمها أيام

ويرحم الشهداء اللي من الواضح ان دمهم حيروح هباء

حسبنا الله و نعم الوكيل

حسبنا الله و نعم الوكيل

حسبنا الله و نعم الوكيل

أنا أسفة لو كان كلامي خارج أو كنت منفعلة

يا ريت تقروا البوست ده

أكتر من رائع 

 آخر ما عندي 


لماذا يتعين رفض التعديلات الدستورية؟ 

يا رب

مصر يا رب

الثورة يا رب

ملناش غيرك

ملناش غيرك حد
أي حد
يااااا رب

الانتخاب بالرقم القومي ..بس خللي بالكم

السلام عليكم يا جماعة

أنا سمعت من صديقة ليا ان الانتخاب بالرقم القومي..بس لازم يكون اسمك مدرج في القوائم الانتخابية..و ان آخر ميعاد لده 9 مارس

 لأن كل سنة شهر ديسمبر بيكون مخصص لأي حد عايز يحط اسمه في الكشوف الانتخابية ونظرا للظروف الراهنة فتحوا الموضوع ده استثنائياً لحد 9 مارس

رحت القسم اللي أنا تبعه و فعلا لقيت اني لازم اديهم صورة البطاقة و يكتبوا اسمي في كشف عندهم و يدوني ورقة بكدة.
سألت الضابط هو أخر ميعاد امتى قالي معرفش!! قلتله يعني ايه معرفش؟قالي يمكن شهر ابريل
رحت لضابط كبير في القسم سألته قالي فعلا أخر ميعاد 9-3
سألته طب ليه مش بتعلنوا عن الموضوع ده..قالي يمكن يمدوها شوية
أنا مش متأكدة الحقيقة فين بس يا ريت نحطاط كلما و نروح نسجل أسامينا.
ألا قد بلغت اللهم فاشهد
 دوس هنا