Saturday, 15 October 2011

الوقفة الصامتة الحزينة











أنا كنت حزينة قوي في الوقفة دي..عشان الناس اللي ماتت و الشباب اللي زي الورد اللي راح..و عشان جيش بلدي بيعمل كدة في أهله و ناسه.بس حاجة كمان كانت مخليا فيه مرارة فظيعة في قلبي
افتكرت وقفات خالد سعيد الصامتة ..نفس الوشوش اللي كانت بتشارك فيها..و نفس الناس بتمر قدامنا و تبص باستغراب أو بتتريق..الا القليل منهم لأكون صادقة.
حسيت ان مفيش حاجة اتغيرت و ان مفيش ثورة قامت و ان بدل خالد واحد بقو 30 و لاأكتر..و بدل الداخلية بقى الجيش و الداخلية
ما هو أصل لو كان فيه ثورة قامت و لا لو كانت حتى انتفاضة و لا حتى حركة اصلاح مكناش احتاجنا نقف الوقفة دي
حزنا على دم مصريين بيسيل عادي كدة و اللي حاكمينك يا مصر حتى مقلوش احنا غلطانين
أنا حزينة على مصر قوي و موجوعة قوي قوي من حالنا..نفسي الناس تفوق و مش عارفة حيفوقوا ازاي و لا امتى.
أنا مش حيأس و لا حبطل مش عشان عندي أمل..بس عشان نفسي ولادي يتعلموا انك لما تؤمن بحاجة ميهمكش رأي حد و ميغيرش من ايمانك أي حاجة و تفضل تدافع عنها لحد ماتموت.
أنا بحب مصر قوي ..و مؤمنة بيها و نفسي أشوفها فرحانة و بتضحك
ياا رب صبر أهالي اللي راحوا و اللي لسة حيروحوا...ياا رب أنا مؤمنة بيك قوي...و عارفة ان احنا لو فضلنا كدة فده عدلك لأن احنا نستاهل كدة... و لو عدينا كل ده و مصر شافت الخير فده برحمتك يا رب و انت أرحم الراحمين

2 comments:

فاتيما said...

شكرا ع البوست دا يا داليا

انا عارفة انك زعلانة

بس معلش
افتكرى ان كل حاجة انعملت ف البلد دى عشان تقوم من رقدتها
كان بزعل
ودم
و تضحية

بس العبرة بالخواتيم يا دودى

العبرة يا حبيبتى بنهايتها
وان شاء الله
النصر لنا

البوست مهم
لأنه بيوثق لحظة مهمة زى دى
رفعلى معنوياتى انا شخصياص
وخلانى أحس اننا متكاتفين
ف القاهرة واسكندرية
وأى حتة
لسه فيها صمود
واصرار على الحق انه يتاخد

المشكلة ف الللى بيسمع
ان ودانه مسدودة

المشكلة مش فينا
والوقفات دى
والمسيرات والمظاهرات وغيرها
تفهمنا دا

ان فيه امل

تصورى اللى اتعمل ف مصر
سمع ف كل حتة
وشجع بلاد من شرق الكورة لغربها
تعمل زينا
وف كل مكان فيهم تلاقى يافطة
بتحيى ميدان التحرير
وثوار مصر ...

شوفتى الإلهام والنصر ؟

نثبت بقى ولا إيه ؟

انا عارفة الغجابة
لأنك قولتيها ف البوست

وصبر جميل يا حبيبتى
ويا ادفى كورنر ف قلبى

dahlia.. said...

فاتيما
أنا متأكدة ان طول ما في البلد دي شباب بيحبها..حيفضل فيه أمل بس زي مانت بتقولي الحكاية عايزة نفس طوييييل يمكن أطول من عمرنا كله بس مش مهم المهم ان يوسف و فارس و يحيي يحسوا في يوم بالفرق.
موضوع الثورة العلمية ده خلاني أحس بفخر عجيب بمصر و بميدان التحرير ..شكرا يا فاتيما على كلامك الحلو