Saturday, 12 March 2011

من الآخر كدة

أنا بجد مرعوبة 
مرعووبة أكتر 1000 مرة من يوم 28 لما العربية الدبلوماسية البيضا عدت جنبي في القصر العيني
مرعوبة أكتر 1000 مرة من رعبي و أنا شايفة الجثث و الدم في كل حتة
يومها كنت عارفة و الناس كلها عارفة ان الشر بيحارب الخير
كلنا كنا عارفين يومها مين الظالم و مين المظلوم..مين الصح و مين الغلط
و دلوقتي؟؟؟؟
محدش عارف أي حاجة..الثوار بقوا عملا و النشطاء بقوا بلطجية
و عمرو موسى بقى الرئيس المنتظر
و الجيش بقى بطل الأبطال و هو بيصعق الناس و يعذبهم عشان مسمعوش الكلام!!!
و تسمع ناس كتييييير بتقول"أحسن في 60 داهية خللي البلد تنضف!" و ناس تانية تتحايل عالجيش و تقوله و النبي و النبي عايزيين أحكام عرفية!"
بجد احنا عايشين في مؤامرة كبيييييرة و كل واحد بقى جواها و بيساعد فيها..بكلامه أو أفعاله أو حتى سكوته
و الوقت بيمر و الناس بتزهق..والتعديلات الخايبة جاية..و الناس عايزة تخلص
و الجيش عايز يخلص الليلة..بس المهم يخلصها صح
و سلملي عالثورة
أنا معنديش نصايح و لا حلول سحرية و لا زفت
كل اللي أقدر عليه و اللي أعتقد ان كل واحد فاهم و بيفكر يقدر عليه هو انه يفكر في موضوع التعديلات الدستورية دي 
عايزة أسأل كام سؤال
ليه التصويت على التعديلات كلها مش مادة مادة..هي دي الديموقراطية اللي مات الناس عشانها و اتصابنا من تحت راسها؟
ليه التعديلات دي مفيهاش أي تقليص لصلاحيات الزفت الرئيس؟
ليه مفيش أوبشن تالت مع نعم و لا و يكون دستور جديد؟

يا نااااااااس أنا مصدومة من ناس من قلب الثورة بتقول حاقول أه عشان الجيش خلاص اتخنق مننا
طب ما مبارك كان مخنوق مننا..مسكتنلوش ليه؟
الجيش اتخنق من الاعتصامات؟يطلع أم المعتقلين و يعمل دستور جديد أو لو ملوش مزاج  يضيف كام تعديل على التعديلات دي و أهمها صلاحيات الزفت و يخليه دستور مؤقت و يقبض على الكلاب صفوت و سرور و زكريا اللي طالع يتفشخر بعد أمن الدولة مفرملوا ورقه و بيقول انه شغاااال مع الجيشو طظ فيكم
اعقلوهااااا يا ناس
ولو رجعتم تخافوا تاني و مش عايزيين ثورة و لا زفت أقل حاجة أقل حاجة أقل حاجة تعملوها انكم تقولوا لا لا لا للتعديلات الدستورية
عشان جيشنا بتاع الأغلبية و المليون اللي بيصدقهم يعرف ان الأغلبية اهي رافضة اللي بيعملوا
فيعملهم اللي هم عايزينه
و يا ريت لو جيشنا بجد اتخنق و زهق من المدنيين و مش عايز مظاهرات و عايز يرجع مكانه يعمل استفتاء على المجلس الرئاسي ده
عشان مش كل حاجة عايزنها ننزله الشارع و يبهدل فينا
أنا مش بكره الجيش و لا ضده..بس أنا واثقة ان قياداته من النظام القديم اللي احنا كنا بنادي زماااان و نقوله " الشعب يريد اسقاط النظام"
الله يرحمها أيام
ويرحم الشهداء اللي من الواضح ان دمهم حيروح هباء
حسبنا الله و نعم الوكيل
حسبنا الله و نعم الوكيل
حسبنا الله و نعم الوكيل


أنا أسفة لو كان كلامي خارج أو كنت منفعلة
يا ريت تقروا البوست ده
أكتر من رائع 

3 comments:

فاتيما said...

ازيك يا داليا

انا قريت البوست اول ما نشرتيه
ومكنتش عاوزة اعلق
عشان ردى كان هيبقى كله احباط

قولت استنى شوية
عشان مزودهاش عليكى

بس الأنتظار
مكنش حل

انا لسه محبطة زيك
وهتجنن من موقف ناس يفترض انها كانت من قلب الثورة ونبضها الدافق
ويتحولوا بالشكل المزعج دا

التشكيك فى نزاهتم مرفوض اكيد

لكن المؤسف ف تحولهم العجيب
وخنوعهم الشديد
والتنازلات الغير مفهومة دى

ليه نتنازل ؟

مين اللى جايب مين
ومسكه السلطة (مؤقتأ) ومين يفرض ارادته على مين ؟

الشعب

اللى لما بينزل
بيهد ويهز أى طاغية

ليه نتنازل
ونرجع خطوات مهينة للوراء كدا ؟!!

اكتر اشخاص صدمت فى ارائه نوارة وبلال فضل وفهمى هويدى

للأسف
التلاتة فجأة حسيتهم بعدوا عن الناس
مع انهم اكتر تلاتة بيميلوا دايما لنظرية الشك
وانك متطمنش غير لما تاخد حقك لحد أخر جزء منه
وتشوفه ملموس ف الواقع

ليه نقبل بتعديلات
ليه مفيش دستور كامل ؟

وليه نبقى تحت حكم العسكر سنه
ليه مفيش مجلس رئاسى

ليه لجنة الدستور متعنتة

وليه مفيش تحقيقات عن ايذاء المعتصمين

ليه وليه
والف ليه حزينة موجعة


اتمنى الأستفتاء يكون لصالح المستقبل
مستقبل البلد دى

وميرجعهاش لورا الف خطوة


انا خايفة ومرعوبة زيك يبا داليا
مع انى مكنتش مكانك واتشرفت بسكنى الميدان وقت الثورة وشفت الويل زيكم

بس قلبى واجعنى
وبفتكر دم الشهدا
والمفقودين والمصابين
والرعب اللى حصلنا كلنا
والبلد اللى تستاهل كل الخير دى
وفيه اللى عاوزين يتهاونوا تانى ف حقها بعد ما كنا خلاص ..قدرنا
وملكنا زمام الأمور

ربنا يستر

مش بقولك مكنتش عايزة اكتبلك تعليق
عشان هيبقى بايخ

خير

ادعى يا داليا وكفاية
تقولى يا رب

وبوسيلى فارس ويحيى
لو سمحتى

وسلامى لفارسك الكبير
:)

خلى بالك من صحتك واعصابك
لو ممكن

ويبدو ان الثورة زى الوليد كدا
مينفعش ما ان يولد ..انك تتوربى عنه لحظة ولا تسيبيه ف عهدة حد الا اخلص الناس ليكى
وما اقلهم هذه الأيام حوالينا


تحياتى وبوساتى وحضونات
يا غالية

dahlia.. said...

ازيك يا فاتيما..على فكرة أنا قلقانة و قلبي و اجعني عليكي بقالي مدة و كذا مرة أحاول أكتبلك ايميل بس أرجع أقول أستنى لما الأمور تتحسن و الواضح ان لحنا حنستنى كتير قوي..أنا مقتنعة ان كل واحد حر في رأيه بس لما يكون رأيه ده نتيجة لخوف من ردود فعل الجيش و خوف على صورته و كأنه طاهر بريء ده خلاني بجد أعيط لما قريت و جهة نظر نوارة و غيرها..ليه كدة..هو احنا نستحق كدة بس.هو احنا ليه مش بنتعلم.بعد كل ده نسلم رقبتنا تاني للوطني و الأخوان و هم يحددو لنا مصيرنا مع أن مصيرنا دلوقتي في ايدنا احنا..مستغربة قوي ان لسة في ناس لسة بتقولك أهم حاجة اقتصاد البلد ز كأن البلد دي كانت متنغنغة 30 سنة و احنا خربناها..حسبي الله و نعم الوكيل و في النهاية لأن دي الديموقراطية لازم نقبل الرأي الأخر لو انتصر في النهاية..و انتي بقى يا فاتيما دورك أكبر كم دور أي حد نزل و شارك في الثورة دي..امتي كتيير قوي بيحبوكي و يتابعوكي..و دورك انك توعي الناس بطريقتك اللي بتدخل القلب على طول:)أنا بجد بحس ان لسة فيه أمل لما بدخل عندك المدونة..حاولي و حاولي لحد يوم السبت الساعة 7 الا خمسة..و ان شاء الله خير..أنا و الله بكبم الناس في الشارع و السواقين في الميكروباص و المرضى اللي بيجولي الشغل لحد ما أمي قالتلي انتي عقلك اتلحس..أنا بحب البلد دي قوي..و عايزة ولادي يكبروا و هما بيحبوها..أنا بغنلهم دلوقتي على الأقل 10 مرات في اليوم"ارفع راسك فوق انت مصري"
وحشني حضنك بجد
بحبك

Rames Nashat said...

مدونة جميلة جدا


http://diariesoffrustratedguy.blogspot.com/